वातावरणातील बदलाने कोळंबीची चव होतेय कमी

वातावरणातील वाढत्या कर्बवायूचा परिणाम सागरी पाण्यावर होत आहे. या वाढत्या सामूचा परिणाम सागरी जिवांवरही होत असून, कोळंबीच्या मरतुकीमध्ये व चवीमध्येही घट होत असल्याचे आंतरराष्ट्रीय संशोधकांच्या गटाने केलेल्या अभ्यासात दिसून आले आहे.
वातावरणातील बदलांचे पिकावर होणारे परिणाम तपासले जात आहेत, तसेच सागरी जिवांवर होणाऱ्या परिणामांचा अभ्यास केला जातो.

मात्र आज जागतिक पातळीवर फार मोठी लोकसंख्या आहारासाठी सागरी उत्पादनावर अवलंबून आहे, त्यामुळे वातावरणातील बदलांचा त्यांच्या चवीवरही परिणाम होत असल्याचे कॅलिफोर्निया विद्यापीठातील संशोधकांसह आंतरराष्ट्रीय संशोधकांच्या गटाने केलेल्या अभ्यासामध्ये दिसून आले आहे.

जागतिक पातळीवर वाढलेल्या कर्बवायूचे शोषण सागरामध्येही होत असते. परिणामी आम्लतेचे प्रमाण वाढत असल्याने कोळंबीच्या संवेदनशील घटकावर परिणाम होतो. त्यांच्या चवीमध्येही बदल होत असल्याचे स्पष्ट झाले आहे.

असा झाला प्रयोग

• एका टाकीमध्ये शेकडो उत्तरी कोळंबी (Pandalus borealis) ठेवण्यात आल्या. 22 व्या शतकाच्या सुरवातीला अंदाजे सागरी पाण्याचा सामू (पीएच) हा 7.5 व तापमान 11 अंश सेल्सिअसच्या दरम्यान असण्याची शक्‍यता आहे. त्याप्रमाणे टाकीमध्ये आठ पीएच व तापमान 11 अंश सेल्सिअसचे पाणी ठेवण्यात आले. या कोळंबीच्या तग धरण्याच्या क्षमतेसोबतच त्यांच्या चवीवर होणाऱ्या परिणामांच्या चाचण्या घेण्यात आल्या.
• कमी आम्लतेच्या पाण्यामध्ये असलेल्या कोळंबी या 3.4 पट अधिक चवदार असल्याचे सांगितले, तर अधिक आम्लतेच्या कोळंबीची चव 2.6 पट खराब असल्याचे सांगितले.
• पीएच कमी झाल्यानंतर कोळंबी मरण्याच्या घटनामध्ये 63 टक्के वाढ झाली.
• हे संशोधन "जर्नल फॉर शेलफिश रिसर्च' मध्ये प्रकाशित झाले आहे.

स्त्रोत: अग्रोवन