অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

सीताफळ बाग

सीताफळ बागेचे व्यवस्थापन

-सध्याच्या परिस्थितीचा विचार करता बागेची स्वच्छता अत्यंत महत्त्वाची आहे. बागेत पडलेली पाने, काळी रोगट फळे, झाडावर लटकलेली काळी फळे बागेबाहेर नेऊन त्यांची योग्य विल्हेवाट लावावी. बागेतील मित्रकीटकांना हानी पोचणार नाही याकडे विशेष लक्ष द्यावे. 
-बहराचे नियोजन करताना झाडांमध्ये व मोकळ्या जागेत पालापाचोळ्याचे आच्छादन करावे. आच्छादनामुळे पाण्याचे बाष्पीभवन कमी होऊन पाण्याची बचत होते व तणांचा उपद्रवही कमी होतो. 
-सीताफळासाठी ठिबक सिंचनाचा वापर केल्यास पाण्याचा कार्यक्षम वापर होतो. उत्पादनामध्ये भरीव वाढ होते. फळांची प्रतवारी सुधारण्यास मदत होते. प्रतिझाड पाण्याची मात्रा अनुभवानुसार जमिनीचा पोत, पीकवाढीची अवस्था, हवामान यानुसार बदल करावेत. जमीन नेहमी वाफसा अवस्थेत राहील एवढेच पाणी द्यावे. 
-बागेत खेळती हवा व स्वच्छ सूर्यप्रकाश येईल याकडे लक्ष द्यावे, दर्जेदार व वजनदार फळे मिळविण्यासाठी ते गरजेचे आहे. 
-सूर्यप्रकाश हा फळांच्या वाढीतील मुख्य घटक आहे. बहराचे पाणी सुरू करण्यापासून ते फळे काढणीपर्यंत चांगला सूर्यप्रकाश महत्त्वाचा. परंतु या वर्षी सीताफळ आगारामध्ये आकाश जून, जुलै व ऑगस्टमध्ये संपूर्ण ढगाळलेल्या अवस्थेतच अधिक काळ होते. त्याचा विपरीत परिणाम झाडांच्या व फळांच्या वाढीवर आढळून येत आहे. कमी पाऊसमान व सततचे ढगांचे आच्छादन यामुळे कीड व रोगांमध्ये वाढ झाली आहे. 
-आर्द्रता हा देखील महत्त्वाचा घटक आहे. आर्द्रतेचा परिणाम झाडांची वाढ, फळधारणा, फळांची वाढीवर होतो. तसेच रोगांचा प्रादुर्भावही आर्द्रतेमुळे काही वेळा दिसतो. सर्वांत अधिक फळधारणा जमिनीलगतच्या भागात आढळून येते. याचे प्रमुख कारण म्हणजे जमिनीलगत अधिक आर्द्रता हे आहे. या वर्षी आर्द्रतेचे प्रमाण कमी असल्याचा परिणाम सीताफळ बागांमध्ये आढळून येत आहे. फळांची संख्या कमी व फळांचे आकारमानदेखील लहान आहे. फळांचे सरासरी वजनदेखील कमी आहे.


पानांवरील ठिपके या रोगाच्या नियंत्रणासाठी

100 ग्रॅम बेनोमील + 50 मि.लि. स्टिकर प्रति 100 लिटर पाण्यात मिसळून फवारावे. फळसड हा रोग "कोलेटोट्रिकम ग्लिओस्पोराईड्‌स' या बुरशीमुळे होतो. नियंत्रणाकरिता एक टक्का बोर्डो मिश्रण फवारावे. गरजेप्रमाणे पुढील तीन ते चार फवारण्या दर 15 दिवसांच्या अंतराने कराव्यात.


पिठ्या ढेकणाच्या एकात्मिक कीडनियंत्रणासाठी

खोडांची व फांद्यांची बहरापूर्वी स्वच्छता महत्त्वाची आहे. याची पिल्ले खोडावर चढतात. यासाठी उपाय म्हणून 15 ते 20 सेंटिमीटर रुंदीची प्लॅस्टिक पट्टी घेऊन त्यास ग्रीस लावावे. सदरची पट्टी खोडाला बांधावी, त्यामुळे पिल्ले ग्रीसला चिकटून मरून जातात. क्रिप्टोलिमस मॉंट्रोझायटी या परोपजीवी कीटकांमुळे पिढ्या ढेकूण या किडीचे प्रभावी नियंत्रण होते असे संशोधनातून दिसून आले आहे. त्याकरिता 1000 ते 1500 भुंगेरे प्रति एकर सायंकाळी सहानंतर बागेत सोडावेत. बागेत मित्रकीटकांना अपायकारक कीटकनाशके फवारू नयेत.

 

माहिती संदर्भ : अॅग्रोवन

 

अंतिम सुधारित : 10/7/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate