मका लागवड

प्रस्तावना

मका लागवडीसाठी मध्यम ते भारी, खोल, रेतीयुक्त, उत्तम निचऱ्याची जमीन आवश्‍यक असते. नदीकाठची गाळाची जमीन असल्यास अधिक चांगले. योग्य मशागत करून प्रतिहेक्‍टरी 20 गाड्या शेणखत किंवा कंपोस्ट खत मिसळावे.
1) जून ते जुलै महिन्याच्या दुसऱ्या आठवड्यापर्यंत लागवड करावी. पेरणी टोकण पद्धतीने करावी. उशिरा व मध्यम कालावधीचे वाण असल्यास 75 x 20 ते 25 सें.मी., तर कमी कालावधीचे वाण असल्यास 60 x 20 सें.मी. अंतरावर पेरणी करावी. हेक्‍टरी 15 ते 20 किलो बियाणे वापरावे.
2) प्रतिकिलो बियाण्यास दोन ते अडीच ग्रॅम थायरम पेरणीपूर्वी लावावे, तसेच पेरणीपूर्वी 250 ग्रॅम ऍझोटोबॅक्‍टर प्रति 10 किलो बियाण्यास बीजप्रक्रिया करावी. लागवडीसाठी शिफारशीत वाणांची निवड करावी.
3) खरीप हंगामात मक्‍यामध्ये उडीद, मूग, चवळी, सोयाबीन, भुईमूग, तूर या आंतरपिकांची लागवड करावी.
4) पेरणीच्या वेळी प्रतिहेक्‍टरी 40 किलो नत्र, 60 किलो स्फुरद आणि 40 किलो पालाश द्यावे; तसेच पेरणीनंतर 30 दिवसांनी 40 किलो नत्र, तर पेरणीनंतर 40 ते 45 दिवसांनी 40 किलो नत्र द्यावे. माती परीक्षणानुसार जमिनीत झिंकची कमतरता असल्यास हेक्‍टरी 20 ते 25 किलो झिंक सल्फेट द्यावे.
5) मक्‍यामध्ये वाढीची अवस्था (20 ते 40 दिवस), फुलोरा अवस्था (40 ते 60 दिवस) आणि दाणे भरण्याची अवस्था (70 ते 80 दिवस) या संवेदनशील अवस्था असतात. यापैकी कोणत्याही अवस्थेत पाण्याची गरज भासल्यास पाणी द्यावे.

संपर्क - 0231 - 2601115

मका सुधार प्रकल्प, कसबा बावडा, कोल्हापूर -------------------------------------------------------------------------------------------------

स्त्रोत: अग्रोवन