(लॅ. टेकोमा कॅपेंसिस कुल-बिग्नोनिएसी). मूळची दक्षिण आफ्रिकेतील पण हल्ली सर्वत्र शोभेकरिता बागेतून लावलेली झुडूपवजा वेल. पाने संमुख (समोरासमोर), संयुक्त व विषमदली; दले ७—९, दंतुर, अंडाकृती.
नारिंगी किंवा शेंदरी लाल फुलांच्या मंजऱ्या सप्टेंबर—ऑक्टोबरात फांद्यांच्या टोकांस येतात; संवर्त पेल्यासारखा व संदले पाच; पुष्पमुकुट खाली नळीसारखा पण टोकास पसरट व किंचित वाकडा; पाकळ्या चार व त्यांपैकी एक मोठी; केसरदले चार व दीर्घद्वयी; एक वंध्य केसर; खोलगट बिंबावर किंजपुट असून बोंड अनेकबीजी व तडकणारे असते [→ फूल].
व्यवस्थितपणे छाटणी करून ही वेल सरळ झुडुपाप्रमाणे वाढविता येते किंवा घराच्या दर्शनी भिंतीवर चढवून घराचे सौंदर्य वाढविता येते. हलकी, सकस व चांगली निचऱ्याची जमीन या वेलीला मानवते; भरपूर सूर्यप्रकाश आवश्यक असतो. छाट कलमे लावून नवीन लागवड करतात. अनुकूल परिस्थितीत वर्षभर फुले येतात.
लेखक: देशपांडे, सुधाकर
स्त्रोत: मराठी विश्वकोश
अंतिम सुधारित : 9/14/2019