(इं. वाँडरिंग ज्यू, स्पायडरवर्ट; लॅ. झेब्रिना पेंड्युला कुल-कॉमेलिनेसी). ही जमिनीवर पसरत वाढणारी ओषधी मूळची अमेरिकेच्या उष्ण भागातील (मेक्सिको) असून फांद्यांची टोके वर वळलेली असतात.
पाने मांसल, अंडाकृतीआयत, टोकदार असून वरच्या बाजूवर झीब्र्याप्रमाणे पट्टे (एक जांभळट व दोन पांढरे) असतात व ती खाली किरमिजी रंगाची व केसाळ असतात. आवरक (वेढणाऱ्या) देठाच्या तळाशी व टोकांशी केसांचा झुबका; फुले थोडी, बिनदेठाची, जांभळट लाल व प्रत्येकास तळाशी दोन गुलाबी छदे असतात.
संवर्त व पुष्पमुकुट नळीसारखे, पाकळ्या जुळलेल्या, केसरदले पांढरी, सहा व सारखी असतात. ऊर्ध्वस्थ किंजपुटात तीन कप्पे व प्रत्येकात दोन बीजके असून बोंड त्रिखंडी असते.
बागेत खडकाळ जमीन झाकण्यासाठी, कुंडीत किंवा लोंबत्या परडीत शोभेकरिता ही लावतात; कलमांपासून नवीन लागवड सहज होते. हिचा रूपेरी प्रकार विशेष लोकप्रिय आहे. सावलीत ओलसर जागी चांगली वाढते आणि नयनमनोहर दिसते.
लेखक: ज. वि.जमदाडे
स्त्रोत: मराठी विश्वकोश
अंतिम सुधारित : 10/7/2020