অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

फीनिक्स - फुलझाड

फीनिक्स - फुलझाड

लॅ. फीनिक्स पॅल्युडोजा. फुलझाडांपैकी [वनस्पती, आवृतबीज उपविभाग] एकदलिकित वर्गातील एका तालवृक्षाचे शास्त्रीय नाव. हा वृक्ष , खजूर व शिंदी यांच्या वंशातील आणि पामी कुलातील (ताल कुलातील) असल्याने त्याची अनेक सामान्य शारीरिक लक्षणे त्यांच्याप्रमाणे आहेत. अंदमान व निकोबार बेटे, सुंदरबन व ब्रह्मदेश येथे तो समुद्रकिनाऱ्यावरच्या दलदलीत आढळतो. तो बंगाली भाषेत ‘हिंतल’ नावाने ओळखला जातो. याचे रेलून किंवा जमिनीसरपट वाढणारे खोड २·५-८ मी. लांब व ९ सेंमी. व्यासाचे असते व त्यापासून वर २·५-३ मी. लांबीची मोठी, संयुक्त व पिसासारखी पाने येतात; त्यांची दले ३०-६० सेंमी. लांब असतात. या वृक्षांची बेटे बनलेली आढळतात. पानांच्या देठावर काटे असतात. फुलोरे स्थूलकणिश प्रकारचे [पुष्पबंध] ४५ सेंमी. लांब, एकलिंगी व विभक्त झाडांवर (वेगवेगळ्या झाडांवर) मार्च ते एप्रिलमध्ये येतात. पुं-पुष्पे पिवळट व स्त्री-पुष्पे हिरवट. मृदुफळ लहान, १·२५ सेंमी. लांब, पिवळे व पक्व झाल्यावर गर्द जांभळे असून ते खाद्य, शीतकर (थंडावा देणारे) व शोथरोधी (दाहयुक्त सूज कमी करणारे) असते. बी एकच असते. खोडातील भेंडही खाद्य असते. लहान खोडापासून हातातील काठ्या व जून खोडापासून तराफे तयार करतात. पानांचा उपयोग छपरे, दोर, कुंपण इत्यादींकरिता करतात.

लेखक :शा. दा. पाटील

स्त्रोत - मराठी विश्वकोश

 

अंतिम सुधारित : 10/5/2019



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate