विविध पिकांसाठी सूक्ष्मसिंचन पद्धती

1. पारंपरिक सिंचनाच्या तुलनेत 50 ते 70 टक्के पाण्याची बचत होते.
2. पिकाची एकसमान उगवण व एकसमान वाढ होते.
3. तणांचा प्रादुर्भाव कमी होतो, मजूरही कमी लागतात.
4. रोग व किडींचा प्रादुर्भाव कमी होतो.
5. विजेची बचत होते, खतांची कार्यक्षमता वाढते.
6. उत्पादनात वाढ होते, त्याची प्रतही सुधारण्यास मदत होते.

ठिबक सिंचन पद्धतीचा कार्यक्षम पद्धतीने वापर करावयाचा असल्यास त्याची योग्य निवड करणे अतिशय महत्त्वाचे आहे. कारण बहुतेक पिकांच्या कार्यक्षम मुळांची कक्षा ही 30 ते 50 सेंमी खोलीपर्यंत असते. पिकासाठी अन्न व पाण्याचे शोषण हे याच थरातून मुळांद्वारा केले जाते म्हणून ओलिताची खोली नियंत्रित करणाऱ्या ठिबक सिंचनाची निवड करणे गरजेचे आहे. म्हणजेच कमी अंतरावर, कमी विसर्ग असणारे ठिबक निवडल्यास ओलिताची खोली नियंत्रित करणे सहज शक्‍य होते, त्यामुळे जमिनीत हवा खेळती राहून पाणी व खत यांचा कार्यक्षम वापर केला जातो. त्यामुळे पिकांचे उत्पादन वाढण्यास मदत होते.

बहुतेक सर्व पिकांसाठी ठिबक निवडताना नळीच्या आतून ड्रीपर असणारी तसेच कमी अंतर, कमी विसर्ग असणारी ठिबक सिंचन यंत्रणा (लो स्पेसिंग लो डिस्चार्ज) निवडणे फायद्याचे असते. पिकांच्या वाढीची अवस्था तसेच जमिनीचा प्रकार व हवामान इत्यादी गोष्टींचा विचार करून आपणास पिकाला लागणारे पाणी व खते मोजून मापून देता येत असल्याने ठिबक सिंचन ही श्रेष्ठ सिंचन प्रणाली आहे.

स्रोत: अग्रोवन