<div id="MiddleColumn_internal"> <h3 style="text-align: justify; ">लातूर कृषी विभागातील अधिकारी रमेश चिल्ले यांनी दिलेली माहिती</h3> <p style="text-align: justify; ">रोप लागवड तंत्रज्ञान पद्धतीमध्ये साधारणत: 15 ते 21 जूनअखेर खरीप पेरणी हंगाम गृहीत धरला, तर त्यापूर्वी 25 ते 30 दिवस आधी पॉलिथिन बॅगेत रोपे तयार करून घेतील जातात.</p> <p style="text-align: justify; ">नेहमीच्या प्रचलित किंवा सुधारित जशा बीएसएमआर 736 व 853 किंवा अन्य अधिक उत्पादन देणाऱ्या जातींचे बियाणे 12 6 सें.मी च्या लहान पॉलिथिन बॅगेत लावून रोपे सावलीत वाळवून घेतली जातात.</p> <p style="text-align: justify; ">साधारण 20 ते 25 मे या कालावधीत रोपे तयार करावीत. पुढे जूनमध्ये पाऊस पडल्यानंतर मुख्य पिकाच्या सहा ओळींनंतर एक ओळ रिकामी ठेवून त्यात पेरणीनंतर लगेच म्हणजे पिशवीतील तुरीची रोपे साधारणत: 25 ते 30 दिवसांच्या वयाची झाल्यावर पुनर्लागवड केली जाते. रोपांची उंची त्या वेळी 15 ते 20 सें.मी. होते. दोन ओळींतील अंतर सात ते आठ फूट व दोन रोपांतील दीड ते दोन फूट (जमिनीच्या प्रतीनुसार) याप्रमाणे ठेवले जाते. त्यामुळे मुख्य पिकापेक्षा तूर वर राहते. खाली दबली जात नाही.</p> <p style="text-align: justify; ">नेहमीच्या पद्धतीने तूर घेण्याच्या तुलनेत रोप लावणी पद्धतीने पीक एक महिना आधी येण्याने रोग, किडींमध्ये ते कमी सापडते. फुले व दाणे भरण्याच्या अवस्थेत पाण्याची कमतरता भासत नाही. असे प्रयोग गेल्या तीन वर्षांपासून मराठवाड्यात व कर्नाटक सीमेवरील लातूर जिल्ह्यातील निलंगा, देवणी, उदगीर, शिरूर अनंतपाळ, अहमदपूर, लातूर या तालुक्यांत केले जात आहेत.<br /><b> </b></p> <h3 style="text-align: justify; ">रोप तंत्रज्ञान लागवडीचे फायदे</h3> <p style="text-align: justify; ">रोग-किडीच्या कालावधीत पीक सापडत नाही. एकरी फवारण्यांचा खर्च कमी होतो.<br />तुरीची लागवड लवकर केल्याने जमिनीतील उपलब्ध ओलाव्याचा फायदा घेता येतो.</p> <p style="text-align: justify; ">लवकर लागवडीमुळे मुख्य पिकापेक्षा तुरीची वाढ उंच होते. मुख्य पिकात ती दबली जात नाही.<br />उत्पादनवाढीस मदत होते. बाजारपेठेत लवकर तूर आल्याने दर अधिक मिळू शकतो.</p> <p style="text-align: justify; ">-----------------------------------------------------------------------------------------</p> <p style="text-align: justify; "><span style="text-align: justify; ">रमेश चिल्ले, 9422610775</span><br style="text-align: justify; " /><span style="text-align: justify; ">कृषी विभाग, लातूर</span></p> <p style="text-align: justify; ">स्त्रोत: <a class="external-link ext-link-icon" href="http://www.agrowon.com/Agrowon/20110326/5670415593949704524.htm" target="_blank" title="नवीन विंडो मध्ये ओपन होणारी बाह्य साईट ">अग्रोवन</a></p> <p style="text-align: justify; "><img alt="" title="" class="image-inline" src="https://static.vikaspedia.in/media/images_mr/agriculture/SakalAgrowonLogo.jpg" /></p> </div>