অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

आडसाली ऊसामध्ये आंतरपिके

आडसाली उसाची लागवड 15 जुलै ते 15 ऑगस्ट या कालावधीत केली जाते. आडसाली उसाचा कालावधी 16 ते 18 महिन्यांचा असतो. उसाची लागवड केल्यानंतर पूर्ण उगवण होण्यासाठी सहा ते आठ आठवड्यांचा कालावधी लागतो. सुरवातीच्या कालावधीमध्ये उसाची वाढ हळू होत असल्यामुळे उसाच्या दोन सऱ्यांमध्ये आंतरपीक घेण्यासाठी भरपूर मोकळी जागा असते.

उसामध्ये आंतरपीक घेतल्याने एकूण निव्वळ उत्पन्नात वाढ होते. उसासाठी बियाणे, खते व आंतरमशागतीसाठी केलेला खर्च आंतरपिकाच्या उत्पन्नातून निघून जातो. आंतरपीक घेतल्याने तणांच्या वाढीवर परिणाम होऊन तणांचे प्रमाण कमी होते. आडसाली उसामध्ये द्विदल वर्गातील भुईमूग, सोयाबीन व चवळी ही पिके किंवा मुळा, कोथिंबीर, मेथी व कांदा यासारखी भाजीपाल्याची आंतरपिके घेता येतात. द्विदल वर्गातील आंतरपिके घेतल्यास जमिनीचा पोत सुधारतो.

ऊस बेणेप्रक्रिया


कांडीवरील खवले कीड, पिठ्या ढेकूण तसेच काणी रोगाच्या बंदोबस्तासाठी 300 मि.लि. मॅलॅथिऑन + 100 ग्रॅम कार्बेन्डाझिम 100 लिटर पाण्यात मिसळून या द्रावणात बेणे 10 मिनिटे बुडवावे. रासायनिक बेणे प्रक्रियेनंतर अर्ध्या तासाने 10 किलो ऍसेटोबॅक्‍टर व 1.25 किलो स्फुरद विरघळविणारे जिवाणू प्रति 100 लिटर पाण्यात मिसळून तयार केलेल्या द्रावणात बेणे अर्धा तास बुडवून नंतर लागवड करावी. 

आंतरपिकांसाठी बीजप्रक्रिया


कांदा - थायरम (तीन ग्रॅम प्रति किलो बियाणे) 
सोयाबीन - सोयाबीन गटाचे रायझोबियम जीवाणू संवर्धक 250 ग्रॅम आणि स्फुरद विरघळणारे जिवाणू संवर्धक 250 ग्रॅम प्रति दहा किलो बियाण्यासाठी. 
भुईमूग - रायझोबियम जीवाणू संवर्धक 250 ग्रॅम आणि स्फुरद विरघळणारे जिवाणू संवर्धक 250 ग्रॅम प्रति दहा किलो बियाण्यासाठी. 

लागवडीची पद्धत


सरीवरंबा पद्धत (पारंपरिक पद्धत)  
हलक्‍या जमिनीत 90 सें.मी., मध्यम जमिनीत 100 सें.मी. व भारी जमिनीत 120 ते 150 सें.मी. अंतरावर सऱ्या वरंबे पाडून उसाची लागण सरीमध्ये केल्यानंतर दुसरे पाणी (आंबवणी) देण्याच्या अगोदर वरंब्याच्या दोन्ही बगलेत आंतरपिकाची टोकण पद्धतीने लागण करावी. कांद्याची लागण रोपे लावून करावी. 

पट्टा पद्धत


या पद्धतीत 75 सें.मी. (2.5 फूट) किंवा 90 सें.मी. (तीन फूट) अंतरावर सऱ्या पाडून प्रत्येक दोन सऱ्यांत ऊस लागवड करून तिसरी सरी मोकळी सोडावी. अशा प्रकारे जोडओळ लागवड करून राहिलेल्या 150 सें.मी. (पाच फूट) किंवा 180 सें.मी. (सहा फूट) पट्ट्यात आंतरपिकाची लागवड करावी. 
या पद्धतीत उसाच्या उत्पादनात घट येत नाही व आंतरपीक निघाल्यानंतर उसात आंतरमशागत करणे सुलभ जाते.


: 02169 - 265333 
मध्यवर्ती ऊस संशोधन केंद्र, 
पाडेगाव, ता. फलटण, जि. सातारा

माहिती संदर्भ : अॅग्रोवन

 



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate