<div id="MiddleColumn_internal"> <p style="text-align: justify; ">सध्याच्या काळात गहू, ज्वारी, करडई पिकांच्या वाढीच्या संवेदनशील अवस्थेमध्ये पाणी द्यावे. थंडीची लाट असल्याने फळबागांच्या मध्ये धूर करावा. त्यामुळे काही प्रमाणात तापमान वाढण्यास मदत होते.</p> <h3 style="text-align: justify; ">गहू</h3> <p style="text-align: justify; ">1) वेळेवर पेरलेल्या गव्हास 18 ते 21 दिवसांनी हेक्टरी 60 किलो नत्र व उशिरा पेरलेल्या गव्हास 50 किलो नत्र युरियाद्वारे द्यावे. <br />2) पिकातील तणाचे नियंत्रण करावे. <br />3) पाण्याच्या पाळ्या खालीलप्रमाणे पिकाच्या आवस्थेप्रमाणे द्याव्या. <br />अ) मुकुट मुळे फुटणे (पेरणीनंतर 18 ते 21 दिवसांनी) <br />ब) फुटवे फुटण्याची शेवटची अवस्था (पेरणीनंतर 50 ते 55 दिवस) <br />3) कांड्या धरतेवेळी ( पेरणीनंतर 50 ते 55 दिवस)</p> <h3 style="text-align: justify; ">रब्बी ज्वारी</h3> <p style="text-align: justify; ">1) उशिरा पेरलेल्या ज्वारीच्या पिकात निंदणी व कोळपणी करून पिकातील तणाचे नियंत्रण करावे. <br />2) बागायती जमिनीतील ओल कमी झाली असल्यास व पीक फुलोरा व पोटरीच्या अवस्थेत असल्यास पिकास पाणी द्यावे.</p> <h3 style="text-align: justify; ">करडई</h3> <p style="text-align: justify; "><br />1) सध्याच्या काळात तण नियंत्रणासाठी निंदणी व कोळपणी करावी. <br />2) जमिनीतील ओलावा कमी झाला असल्यास व पाणी देण्याची सोय असल्यास आणि एक फुलावर पीक असताना हलके पाणी द्यावे. शक्यतो एक सरी आड पाणी द्यावे.</p> <h3 style="text-align: justify; ">हरभरा</h3> <p style="text-align: justify; ">1) हरभरा पिकाची निंदणी व कोळपणी करून पिकातील तणाचे नियंत्रण करावे. <br />2) बागायती हरभऱ्याच्या जमिनीतील ओल कमी झाली असल्यास व पीक फुलोऱ्या असल्यास व घाटे भरते वेळी पिकास हलके पाणी द्यावे. पिकांत जास्त पाणी साचणार नाही याची काळजी घ्यावी.</p> <h3 style="text-align: justify; ">रब्बी सूर्यफूल</h3> <p style="text-align: justify; ">1. सूर्यफुलामध्ये निंदणी व कोळपणी करावी. <br />2. सूर्यफूल पेरणीनंतर एक महिन्यांनी प्रतिहेक्टरी 30 किलो नत्र युरियाद्वारे द्यावे. <br />3. पिकास बोंड लागणे, फुलोरा व दाणे भरण्याच्या अवस्थेमध्ये संरक्षित पाणी द्यावे.</p> <h3 style="text-align: justify; ">केळी</h3> <p style="text-align: justify; ">1) केळीच्या बागेस पाण्याच्या पाळ्या नियमित द्याव्या. शक्यतो ठिबक सिंचनाचा वापर करावा. <br />2) बागेचे थंडीपासून संरक्षण करण्यासाठी सकाळी 5 ते 6 वाजेच्या सुमारास बागेभोवती शेकोट्या पेटवून धूर करावा. बागेत रात्रीच्या वेळेस विहिरीचे पाणी द्यावे. <br />4) पक्व झालेले घड काढून घ्यावे. <br />5) ऑक्टोबर महिन्यात लागवड केलेल्या केळीच्या प्रत्येक झाडास 50 ग्रॅम नत्र व 40 ग्रॅम स्फुरद द्यावे. <br />6) झाडाच्या खोडाभोवती आलेली पिले नियमित कापून काढावी.</p> <h3 style="text-align: justify; ">आंबा</h3> <p style="text-align: justify; ">1) आंब्याची नवीन लागवड केलेल्या कलमांना काठीचा आधार द्यावा. <br />2) लागवड केलेल्या कलमांना सावली करावी. <br />3) नवीन लागवड केलेल्या कलमांचे ओळे तयार करून त्यात शिफारशीत कीडनाशकाची भुकटी धुरळावी. त्यानंतर काडीकचरा किंवा वाळलेले गवत यांचे आच्छादन टाकावे. <br />4) पाण्याच्या पाळ्या नियमित द्याव्या. ठिबक सिंचन पद्धतीने पाणी द्यावे.</p> <h3 style="text-align: justify; ">संत्रा, मोसंबी</h3> <p style="text-align: justify; ">1) मृगबहार धरलेल्या बागेस जमिनीच्या मगदुरानुसार 12 ते 15 दिवसांनी दुहेरी बांगडी पद्धतीने किंवा ठिबक सिंचन पद्धतीने पाणी द्यावे. <br />2) आंबे बहर धरण्यासाठी जमिनीची चांगली मशागत करून द्यावी. दुपारी पडलेल्या झाडाच्या सावलीच्या बाहेर कुदळीने गोल खोदून घ्यावे. त्यामध्ये प्रत्येक झाडास चांगले कुजलेले शेणखत 50 किलो व 40 किलो स्फुरद व 40 किलो पालाश खत मिसळून परत मातीने झाकावे. डिसेंबरच्या शेवटच्या आठवड्यात किंवा जानेवारीच्या पहिल्या आठवड्यात बागेस हलके पाणी द्यावे. <br />3) झाडाच्या खोडा जवळ नांगर चालवू नये. ज्यामुळे झाडाची मुळे तुटणार नाही. तसेच झाडाचे खोड, फांद्यांना इजा होणार नाही. <br /><strong>संपर्क ः 02452-229000 <br /></strong>कृषी तंत्रज्ञान माहिती केंद्र, <br />वसंतराव नाईक मराठवाडा कृषी विद्यापीठ, परभणी</p> <p style="text-align: justify; ">स्त्रोत: <a class="external-link ext-link-icon" href="http://www.agrowon.com/Agrowon/20141221/5616942896804665553.htm" target="_blank" title="नवीन विंडो मध्ये ओपन होणारी बाह्य साईट ">अग्रोवन</a></p> <p style="text-align: justify; "><img alt="" title="" class="image-inline" src="https://static.vikaspedia.in/media/images_mr/agriculture/SakalAgrowonLogo.jpg" /></p> </div>