<div id="MiddleColumn_internal"> <p style="text-align: justify; ">जमीन - मका लागवडीसाठी मध्यम ते भारी, खोल, उत्तम निचऱ्याची आणि अधिक जलधारणाशक्ती असलेली जमीन चांगली. <br />पूर्व मशागत - उन्हाळ्यात जमिनीची खोल (15 ते 20 सें.मी.) नांगरट करून कुळवाच्या 2- 3 पाळ्या द्याव्यात. त्या वेळी 25 गाड्या शेणखत प्रति हेक्टरी मिसळावे.</p> <h3 style="text-align: justify; ">सुधारित जाती</h3> <p style="text-align: justify; ">1. लवकर पक्व होणाऱ्या जाती (80 ते 90 दिवस) - <br />कोरडवाहू तसेच बागायती क्षेत्रासाठी. <br />संमिश्र जाती - अरुण, किरण, पारस, सूर्या, पुसा लवकर, महिकांचन, मांजरी. <br />संकरित जाती - एफएच 3211, एफक्युएच 4567. <br />2. मध्यम कालावधीत पक्व होणाऱ्या जाती (90-100 दिवस) - कोरडवाहू, बागायती आणि थोड्याशा उशिरा पेरणीसाठी. <br />संमिश्र जाती - नवज्योत, मांजरी. <br />संकरित जाती- डीएमएच 107, केएच 9451, एमएचएच 69. <br />3. उशिरा पक्व होणाऱ्या जाती (100-110 दिवस)- वेळेवर पेरणी, निश्चित पाऊस किंवा बागायतीची सोय असलेल्या ठिकाणी. <br />संमिश्र जाती - प्रभातस धवल, आफ्रिकन टॉल, शक्ती 1. <br />संकरित जाती - डेक्कन 103, एनईसीएच 117, एचक्यूपीएम 1. <br />पेरणीची वेळ - 15 ऑक्टोबर ते 10 नोव्हेंबर या दरम्यान.</p> <h3 style="text-align: justify; ">पेरणीची पद्धत</h3> <ul style="text-align: justify; "> <li>उशिरा व मध्यम कालावधीच्या जातीसाठी - ओळीतील अंतर 60 ते 75 सें.मी. व दोन रोपात 20 ते 25 सें. मी. </li> <li> लवकर तयार होणाऱ्या जातीसाठी - दोन ओळीस 60 सें. मी. व दोन रोपात 20 सें. मी. </li> <li> सरी वरंब्यावर पेरणी करताना सरीच्या बगलेत मध्यावर एका बाजूला पेरणी करावी. </li> <li>बियाण्याचे प्रमाण - हेक्टरी 15-20 किलोग्रॅम बियाणे पुरेसे. </li> </ul> <p style="text-align: justify; ">बीजप्रक्रिया - 2 ते 2.5 ग्रॅम थायरम प्रति किलोग्रॅम बियाणे. त्यानंतर ऍझोटोबॅक्टर जिवाणू संवर्धक 15 ग्रॅम प्रति किलो बियाणे चोळावे.</p> <h3 style="text-align: justify; ">रासायनिक खत</h3> <ul style="text-align: justify; "> <li> उशिरा तयार होणाऱ्या जातीसाठी - नत्र, स्फुरद व पालाश 120-60-60 किलो प्रति हेक्टर खतमात्रा द्यावी. त्यातील नत्र 40 किलो पेरतेवेळी, 20 दिवसांनी पुन्हा 40 किलो, 40 ते 45 दिवसांनी 40 किलो या प्रमाणे नत्र विभागून द्यावे. </li> <li>आंतरमशागत - पेरणीनंतर 15 ते 35 दिवसांपर्यंत एक ते दोन खुरपण्या आणि कोळपण्याद्वारे तणांचा बंदोबस्त करावा. </li> <li> किंवा तणनाशक वापर- पेरणीनंतर परंतु पीक उगवणीपूर्वी अट्रॉझीन (50 टक्के) हे तणनाशक 1 किलो किंवा पेंडिमिथॅलीन 1 ली प्रति हेक्टर 500 लिटर पाण्यात मिसळून जमिनीवर फवारावे. </li> </ul> <h3 style="text-align: justify; ">पाणी व्यवस्थापन</h3> <ul style="text-align: justify; "> <li>पेरणीनंतर 20 ते 40 दिवसांनी (पीक वाढीची अवस्था), </li> <li> 40- 60 दिवसांनी पीक फुलोऱ्यात असताना </li> <li> 75- 95 दिवसांनंतर पीक दाणे भरण्याच्या अवस्थेत संरक्षित पाण्याची पाळी देणे आवश्यक आहे. </li> <li>अनियमित पावसाच्या भागात पाण्याचा ताण असलेल्या काळात 0.2 टक्के थायोयुरियाची (नर व मादी) पीक फुलोऱ्यात येण्यापूर्वी फवारणी केल्यास उत्पादनात वाढ दिसून आलेली आहे. </li> </ul> <p style="text-align: justify; "><br />संपर्क - 7588571580, 9421859788 <br />डॉ. व्ही. डी. साळुंके, ए. जी. मुंढे, आर. के. सोनवणे, आर. एल. औंढेकर <br />(गहू व मका संशोधन केंद्र, वसंतराव नाईक मराठवाडा कृषी विद्यापीठ, परभणी.)</p> <p style="text-align: justify; ">स्त्रोत: <a class="external-link ext-link-icon" href="http://www.agrowon.com/Agrowon/20141001/4625204421882563710.htm" target="_blank" title="नवीन विंडो मध्ये ओपन होणारी बाह्य साईट ">अग्रोवन</a></p> <p style="text-align: justify; "><img alt="" title="" class="image-inline" src="https://static.vikaspedia.in/media/images_mr/agriculture/SakalAgrowonLogo.jpg" /></p> </div>