<div id="MiddleColumn_internal"> <p style="text-align: justify; "><span>महाराष्ट्राच्या विदर्भ भागातील जिल्हा</span><span>. </span><span>२०</span><span>०</span><span> ३२</span><span>'</span> <span>ते ११</span><span>०</span><span> ४६</span><span>'</span> <span>उ</span><span>. </span><span>आणि ७६</span><span>०</span><span> ३८</span><span>'</span><span>ते ७८</span><span>०</span><span> २७</span><span>'</span> <span>पू</span><span>. </span><span>क्षेत्रफळ १२</span>,<span>६२६ चौ</span><span>.</span><span>किमी</span><span>.;</span> <span>लोकसंख्या २८</span>,<span>८७</span>,<span>८२६</span><span>. </span><span>याच्या पश्चिमेस अकोला व बुलढाणा</span><span>;</span><span>उत्तरेस मध्य प्रदेशातील निमाड</span><span>, </span><span>बेतूल व छिंदवाडा</span><span>;</span> <span>पूर्वेस वर्धा व नागपूर आणि दक्षिणेस यवतमाळ व वाशीम हे जिल्हे आहेत</span><span>. </span><span>या जिल्ह्यात उत्तरेस मेळघाट</span><span>, </span><span>अचलपूर</span><span>, </span><span>मोर्शी आणि दक्षिणेस दर्यापूर</span><span>, </span><span>अमरावती व चांदूर असे सहा तालुके आहेत</span><span>. </span><span>जिल्ह्याची पूर्व</span><span>-</span><span>पश्चिम लांबी १९३ किमी</span><span>. </span><span>व दक्षिणोत्तर रुंदी १४५ किमी</span><span>.</span><span>आहे</span><span>. </span><span>महाराष्ट्राच्या ३</span><span>.</span><span>९७ टक्के क्षेत्रफळ व ३</span><span>.</span><span>०५ टक्के लोकसंख्या या जिल्ह्यात आहे</span><span>.</span></p> <h3 style="text-align: justify; "><span>भूवर्णन</span><b> </b><span>:</span></h3> <p style="text-align: justify; "><span>मेळघाट व पयानघाट असे या जिल्ह्याचे दोन स्वाभाविक विभाग असून मेळघाट गाविलगडच्या डोंगरांनी व्यापलेला आहे</span><span>. (</span><span>समुद्रसपाटीपासून सरासरी उंची १</span><span>,</span><span>०३६ मी</span><span>.) </span><span>या भागातील सर्वांत उंच बैराट शिखर </span><span>(</span><span>१</span><span>,</span><span>१७७ मी</span><span>.) </span><span>चिखलदऱ्याजवळ आहे</span><span>. </span><span>अमरावती</span><span>-</span><span>चांदूर रेल्वेफाट्याजवळच्या टेकड्या </span><span>(</span><span>४५७ मी</span><span>.) </span><span>सोडल्या तर पयानघाट सखल व सपाट आहे</span><span>. </span><span>याची समुद्रसपाटीपासून सरासरी उंची २५० मी</span><span>.</span><span>आहे</span><span>.</span></p> <p style="text-align: justify; "><span>मेळघाटातील बहुतेक पाणी कामदा</span><span>, </span><span>कापरा</span><span>, </span><span>गार्गा व सिपना या तापीच्या उपनद्यांतून वायव्य सीमेवरील तापी नदीत जाते</span><span>. </span><span>पूर्व सीमेवरून वर्धा नदी दक्षिणेकडे वाहते</span><span>. </span><span>चंडामनी</span><span>, </span><span>मातू</span><span>, </span><span>विदर्भा</span><span>,</span><span>बेवळा व खोलाट या तिच्या उपनद्या होत</span><span>. </span><span>मध्यभागातील प्रथम दक्षिणवाहिनी व नंतर पश्चिमवाहिनी पूर्णा ही जिल्ह्यातील प्रमुख नदी असून शहानूर</span><span>, </span><span>चंद्रभागा व पेंढी या तिच्या उपनद्यांमधला जमिनीचा पट्टा खाऱ्या पाण्याचा आहे</span><span>.</span></p> <p style="text-align: justify; "><span>पयानघाटाचा भाग समुद्रापासून दूर व सखल असल्याने हवामान विषम आहे</span><span>;</span> <span>उन्हाळ्यात सरासरी ४१</span><span>०</span><span>से</span><span>. </span><span>तर हिवाळ्यात १६</span><span>० </span><span>से</span><span>. </span><span>तपमान असते</span><span>. </span><span>उंचीमुळे मेळघाट भाग नऊ महिने थंड असतो</span><span>. </span><span>पण पावसाळ्यातील तीन महिने येथील हवामान रोगट असते</span><span>. </span><span>पावसाची वार्षिक सरासरी उत्तरेस ११०</span><span>,</span><span>पश्चिम भागात ७९</span><span>.</span><span>६</span><span>, </span><span>पूर्व भागात ८४</span><span>.</span><span>५ व दक्षिणेस ७७</span><span>.</span><span>८ सेंमी</span><span>. </span><span>असून १० टक्के पाऊस हिवाळ्यात पडतो</span><span>.</span></p> <p style="text-align: justify; "><span>एकूण क्षे</span><span>त्र</span><span>फळाच्या ३१ टक्के क्षेत्र जंगलव्याप्त असून त्यातील ८१ टक्के एकट्या मेळघाट तालुक्यात आहे</span><span>. </span><span>सागवान</span><span>, </span><span>तिवस</span><span>, </span><span>सलई</span><span>, </span><span>धावडा</span><span>, </span><span>नालडू</span><span>, </span><span>आवळा</span><span>, </span><span>तेंदू ही उपयोगी झाडे असून रोशा गवत व बांबू यांचेही उत्पादन होते</span><span>. </span><span>येथे वाघ</span><span>, </span><span>चित्ता</span><span>, </span><span>हरिण</span><span>, </span><span>सांबर</span><span>, </span><span>अस्वल वगैरे प्राणी आढळतात</span><span>. </span><span>पयानघाटात बाभळीची बने आहेत</span><span>.</span></p> <p style="text-align: justify; "> </p> <p style="text-align: justify; ">माहिती संकलक : अतुल पगार</p> <p style="text-align: justify; ">स्त्रोत : <a class="external-link ext-link-icon" href="#">http://amravati.nic.in/main.html</a></p> </div>