<div id="MiddleColumn_internal"> <p style="text-align: justify; "><span>(होशा; इं. कॉमन जूनिपर; हिं. आरार; लॅ. जूनिपेरस कॉम्यूनिस, कुल-क्युप्रेसेसी). प्रकटबीज वनस्पतींपैकी (गण कॉनिफेरेलीझ) जूनिपेरस वंशातील ह्या जातीची झाडे आर्क्टिक सागरापासून सर्व युरोप (दक्षिणेत १२४० – २४८० मी. उंचीवर), मध्य व उ. आशिया, पू. व प. अमेरिका इ. प्रदेशांत फार मोठ्या प्रमाणावर व भारतात प. हिमालयात (१५०० – ४३५० मी. उंचीवर) आढळतात. यांचा आकार परिस्थितीप्रमाणे क्षुपापासून (झुडूपापासून) ते १५ मी. उंच वृक्षापर्यंत असतो. साल लालसर पिंगट; पाने साधी, लहान सुईसारखी पण काहीशी चपटी, तीक्ष्ण टोकाची व प्रत्येक पेऱ्यावर तीन (मंडलित) असतात. मार्च-एप्रिलात स्त्री-शंकू व पुं-शंकू (प्रजोत्पादक अवयव) स्वतंत्र झाडावर येतात. पुढल्या वर्षी ऑगस्ट-सप्टेंबरात स्त्री-शंकूपासून गोल, लाल किंवा गर्द जांभळे, मांसल फळासारखे शंकुफळ बनते व त्यात बहुधा तीन बिया व प्रामुख्याने मांसल शल्कपर्णाचा (खवल्या पानांचा ) भाग असतो. या फळाचे तेल कातडीस लागल्यास आग होते; फळे व तेल उत्तेजक, मूत्रल, जंतुनाशक, वायुनाशी असून परमा, कटिवात, शोफ (सूज) व पोटशूल (पोटात होणाऱ्या वेदना) इत्यादींवर देतात; ‘जिन’ नावाच्या मद्याला स्वाद आणण्यास हे तेल घालतात; लाकूड सुगंधी असते.</span></p> <p style="text-align: center; "><img class="image-inline" src="https://static.vikaspedia.in/media_vikaspedia/mr/images/rural-energy/environment/91c94893593593f93593f92792493e-93592893894d92a924940/109_2.gif" /></p> <p style="text-align: justify; ">लेखक : शं. आ. परांडेकर</p> <p style="text-align: justify; ">माहिती स्रोत :<a class="external-link ext-link-icon" href="https://marathivishwakosh.maharashtra.gov.in/khandas/khand2/index.php?option=com_content&view=article&id=4528" target="_blank" title="आभाळ"> मराठी विश्वकोश</a></p> </div>