<p style="text-align: justify; "><span>(कुल-बिग्नोनिएसी). ही फार शोभिवंत वेल [ महालता] मूळची ब्राझीलमधील असून इतर देशांत व भारतात सर्वत्र बागेत लावलेली आढळते. सदैव टवटवीत हिरवी दिसणारी पाने समोरासमोर असून प्रत्येक पान पुन्हा विभागलेले (द्विदली, त्रिदली) असते. पाने चुरगळली असता त्यांना लसणासारखा वास येतो. या वेलीची सच्छद [ फूल], मोहक, गुलाबी व तुतारीच्या आकाराची फुले पानांच्या पार्श्वभूमीवर फार सुंदर दिसतात. अॅ. कॅलिसिना व अॅ. निटिडम या दुसऱ्या जातींची फुले पिवळी असतात. उष्ण व दमट हवेत आणि सकस गाळाच्या जमिनीत या वेली चांगल्या वाढतात. दाब-कलमांनी किंवा छाट-कलमांपासून नवीन लागवड करतात. अॅ. पंक्टिफोलियम ह्या द. अमेरिकेतील वृक्षाची मुळे तेथील इंडियन लोक दम्यावर देतात.</span></p> <p style="text-align: justify; ">लेखक :ज. वि. जमदाडे</p> <p style="text-align: justify; ">माहिती स्रोत : <a class="external-link" href="https://marathivishwakosh.maharashtra.gov.in/khandas/khand1/index.php/component/content/article?id=2017" target="_blank" title="ॲडिनोकॅलिमा अॅलीसिया">मराठी विश्वकोश</a></p>