हिंगोली जिल्ह्यातील काही भागात इतर उत्पादनांबरोबरच केळीचे उत्पादनही मोठ्या प्रमाणावर घेतले जाते. याच परिसरातील डोंगरकडा येथील शेतकरी भुजंगराव अडकिणे यांनी चार एकरात साडेपाच हजार केळीच्या पिकांतून तब्बल 18 लाखांचे उत्पन्न मिळविले. अतिशय उत्तम दर्जाची, निर्यातक्षम केळी पिकविल्याबद्दल त्यांचा डोंगरकडा येथे झालेल्या केळी परिषदेत नुकताच सत्कार करण्यात आला.
कळमनुरी तालुक्यातील डोंगरकडा येथील प्रगतशील शेतकरी भुजंगराव अडकिणे यांच्याकडे 40 एकर जमीन आहे. ते पारंपरिक पिकांबरोबर ऊस, केळी, हळदीची पिके घेतात. यापुर्वी त्यांनी 15 ते 16 हजार केळी घेतल्या आहेत. मागच्या वर्षी पाण्याचे प्रमाण कमी झाल्याने त्यांनी यावर्षी चार एकरात साडेपाच हजार केळी घेतल्या. त्यासाठी उपलब्ध पाण्याचा अतिशय काटकसरीने उपयोग केला. मागच्या वर्षी पाण्याचे आणि चाऱ्याचे प्रमाण कमी झाल्याने अनेक शेतकऱ्यांनी केळीच्या कंदांचा जनावरांसाठी चारा म्हणून उपयोग केला.
श्री.अडकिणे हे अनेक वर्षांपासून केळीची लागवड करतात. दरवर्षी त्यांच्या शेतात सुमारे 15 ते 16 हजार केळी असतात. मात्र मागच्या वर्षीची परिस्थिती वेगळी होती. राज्यात आणि विशेषत: मराठवाड्यात टंचाई परिस्थिती निर्माण झाली होती. पिण्याबरोबरच शेतीसाठी पाणी आणि जनावरांसाठी चारा उपलब्ध होत नव्हता. अशा बिकट परिस्थितीतही त्यांनी चार एकरात साडेपाच हजार केळी घेतल्या व नियोजन करून त्याची योग्य निगा राखली, म्हणून चांगले उत्पादन मिळाले.
भुजंगराव अडकिणे यांचे बिकट परिस्थितीत मिळविलेले हे यश इतर शेतकऱ्यांसाठी निश्चितच प्रेरणादायी आहे. याविषयी बोलताना, शेतकऱ्यांनी नेहमीच प्रयत्नशील असावे. एका पिकाचे उत्पन्न घटले तर दुसऱ्या पिकात ते निश्चितच मिळू शकते, मात्र त्यासाठी कठोर मेहनतीची जोड आवश्यक असते, अशी प्रतिक्रिया त्यांनी व्यक्त केली आहे.
लेखक - जिल्हा माहिती कार्यालय, हिंगोली
स्त्रोत - महान्युज
अंतिम सुधारित : 7/28/2023
तूर -तुरीचे घरचे बियाणे असल्यास पेरण्यापूर्वी उगवण...
अळूच्या लागवडीसाठी भरपूर सेंद्रिय पदार्थ असणारी, म...
सध्याच्या काळात मीठा बहराच्या अंजीर फळांच्या वाढीक...
मनीषा व देवनाथ जाधव या दांपत्याने तुती लागवड आणि र...