अर्थशास्त्रीय संकल्पनांतील संदिग्धता काढून टाकून त्यांना नैसर्गिक शास्त्रांतील सिद्धांतां प्रमाणे निश्चित व ठराविक स्वरूप देण्यासाठी गणितीय पद्धती व संख्याशास्त्र यांचा वापर आवश्यक आहे , असे त्याचे ठाम मत होते . अनेक अर्थशास्त्रीय संकल्पनांना त्याने सुटसुटीत समीकरणांचे रूप दिले . गतिमान उत्पादन सिद्धांताच्याच अनेक बाजूंचा त्याने सखोल विचार केला आणि उत्पादनाचे पर्याप्तीकरण सिद्ध करण्यासाठी गणितीय पद्धतीचा अवलंब करणारी ‘ मॅथॅमॅटिकल प्रोग्रॅमिंग ’ ही पद्धती अर्थशास्त्रात रूढ केली . अर्थकारणात भविष्यकालीन धोरणांचा विचार करताना अर्थमितीय प्रतिमाने उपयुक्त ठरतात , हे त्याने सिद्ध केले . गणिताच्या आधाराने नियोजन प्रतिमाने तयार करताना त्याने संगणन पद्धतीचा उपयोग केला .
निवेश उत्पाद विश्लेषणा ला फ्रिशने नवी दिशा दिली. विकसनशील देशांना उपयोगी पडतील, अशी प्रतिमाने निर्माण करताना त्याने पूर्व यूरोपीय साम्यवादी देशातील नियोजन पद्धती मीमांसेत विशेष रस घेतला . रशियाने अर्थशास्त्रीय संशोधनासंबंधी १९६१ मध्ये प्रसिद्ध केलेल्या ग्रंथात फ्रिशच्या आर्थिक नियोजन प्रतिमानावरील प्रदीर्घ लेखाचा समावेश केला आहे .
फ्रिशचे लक्ष १९३० मधी ल आर्थिक महामंदीच्या काळात साकलिक अर्थशास्त्रीय समस्यांकडे वळले . साकलिक अर्थशास्त्रीय संकल्पनांच्या आधारे त्याने गतिमान व्यापारचक्र प्रतिमाने तयार केली . महामंदी रोखण्यासाठी त्याने सुचविलेल्या उपाययोजना आणि ग्रेट ब्रिटन व अन्य देशांत नंतरच्या काळात विकास पावलेल्या केन्सप्रणीत कल्पना यांत विलक्षण साम्य असल्याचे दिसून येते . महामंदीनंतरच्या व दुसऱ्या महायुद्धानंतरच्या काळात अनेक देशांनी अवलंबिलेल्या आर्थिक धोरणांवर फ्रिशच्या विचांराचा प्रभाव जाणवतो . आर्थिक धोरणास दिशा लावण्याच्या बाबतीत त्याचे सैद्धांतिक विचार नेहमीच उपकारक ठरले .
अर्थशास्त्राच्या अनेक क्षेत्रांत फ्रिशने महत्वाची भर घातली . आर्थिक कल्याण , आंतरराष्ट्रीय व्यापार , लोकसंख्या सिद्धांत , निर्देशांक , अल्पाधिकार अशा विविध विषयांवर त्याने लिखाण केले . अर्थमितीचा प्रसार करण्यासाठी त्याने १९३१ मध्ये ‘ इकॉनॉमे ट्रिक सोसायटी ’ स्थापन केली आणि इकॉनॉमे ट्रिका या सुप्रसिद्ध पत्रिकेचे १९३३ ते १९५५ या काळात संपादन केले . भारत , संयु क्त अरब प्रजासत्ताक आदी देशां त त्याने सरकारचा आर्थिक सल्लागार म्हणून काम केले . संशोधनकार्यात तो दिवसरात्र निमग्न असे . त्याने हाती घेतलेल्या प्रचंड उपक्रमाकडे केवळ दृष्टिक्षेप टाकला , तरी त्याचा कामाचा झपाटा किती विलक्षण होता याची साक्ष पटते . त्याने हाती घेतलेले अनेक उपक्रम अपुरे राहिले . आपले सिद्धांत गणितीय व संख्याशास्त्रीय पद्धतींनी मां ड ल्यामुळे त्याचे अनेक लेख किचकट , अगम्य वाटतात . असे असले , तरी त्याच्या संशोधनाचा अर्वाची न अर्थशास्त्रावर खोल प्रभाव पडल्याचे दिसते . गेल्या काही दशकांत अर्थशास्त्राने जी झेप घेतली आहे , तीत फ्रिशचा मोठा वाटा आहे .
लेखक - सुभाष भेण्डे
स्त्रोत - मराठी विश्वकोश
अंतिम सुधारित : 10/7/2020
अमेरिकन जीवरसायनशास्त्रज्ञ.