पपईपासून तयार करा चेरी

यंत्रसामग्री

स्टेनलेस स्टीलचे गंज, चाकू, तराजू व मापे, सीलिंग यंत्र, मसलीन कापड, डबल नेटेड गाळणी

कृती

• प्रथम पूर्ण परिपक्व, निरोगी आणि आकाराने मोठी पपई स्वच्छ धुऊन कोरडी करून घ्यावी.
• कच्च्या पपईची साल व बियांचा भाग काढून पपईचे तुकडे करावे. त्यांचे वजन करावे.
• चुन्याचे आठ टक्के तीव्रतेचे द्रावण तयार करावे. त्यात पपईचे तुकडे 30 मिनिटे ठेवावेत. त्यानंतर हे तुकडे दोन-तीन वेळा स्वच्छ धुऊन घ्यावेत.
• नंतर हे तुकडे मसलिन कापडामध्ये बांधून उकळत्या पाण्यात पाच-दहा मिनिटे धरावेत. म्हणजेच ते ब्लांचिंग करून घ्यावेत. नंतर हे तुकडे थोडा वेळ थंड पाण्यात ठेवावेत.
• या तुकड्यांना दातेरी चाकूच्या साहाय्याने छिद्रे पाडावीत.
• नंतर साखरेचा एकतारी पाक (45-50 ब्रिक्‍स) तयार करून गाळून घ्यावा. नंतर पपईचे तुकडे पाकामध्ये 12 ते 18 तास ठेवावेत.
• दुसऱ्या दिवशी या पाकातील तुकडे वेगळे करून पाकात आवश्‍यकतेनुसार साखर मिसळावी. दोन तारी पाक ( 60-65 ब्रिक्‍स) तयार करावा. पाक गाळून घ्यावा. थंड झाल्यावर त्यात पपईचे तुकडे टाकावेत.
• तिसऱ्या दिवशी त्या पाकातील तुकडे वेगळे करून पाक पक्का होईपर्यंत (75-78 ब्रिक्‍स ) उकळावा. एक किलो पाकासाठी पाच ग्रॅम या प्रमाणात सायट्रिक ऍसिड मिसळावे. सायट्रिक ऍसिड वापरण्यापूर्वी तज्ज्ञांचे मार्गदर्शन घ्यावे.
• पाक गाळून घ्यावा. थंड झाल्यावर त्याच्यात रंग मिसळून पपईचे तुकडे टाकावेत. मिश्रण दोन-तीन दिवस तसेच ठेवावे.
• पाकात तुकडे चांगले मुरल्यावर हे तुकडे पाकातून काढून हवेत वाळवावेत किंवा ड्रायरमध्ये 60 ते 70 अंश सेल्सिअस तापमानाला 22 ते 24 तास ठेवावेत.
• तयार झालेली पपईची चेरी सीलिंग यंत्राने पॉलिथिन पिशवीमध्ये पॅक करावी.

लेखिका- सुनीता चौहान

संपर्क - 9422304948 
(लेखिका कृषी विज्ञान केंद्र, केंद्रीय कापूस संशोधन संस्था, नागपूर येथे विषय विशेषज्ञ (गृहविज्ञान) म्हणून कार्यरत आहेत.)

स्त्रोत: अग्रोवन