महाराष्ट्र राज्य इलेक्ट्रॉनिकी विकास महामंडळ

महाराष्ट्र राज्य इलेक्ट्रॉनिकी विकास महामंडळ

(मेल्ट्रॉन) – राज्यात इलेक्ट्रॉनिकी उद्योगाचा विकास होण्यासाठी महाराष्ट्र शासनाने जानेवारी १९७८ मध्ये ‘महाराष्ट्र राज्य इलेक्ट्रॉनिकी विकास महामंडळ ’ प्रस्थापिले. मार्च १९८२ अखेर महामंडळाला शासनाने ३·८९ कोटी रु. भाग भांडवल पुरविले असून महामंडळाकडे ०·९९ कोटी रु. कर्जे व ०·०३ कोटी रु. राखीव निधी, असे एकूण ४·९१ कोटी रु. भांडवल होते. महामंडळाचे अध्यक्ष एक विख्यात उद्योगपती असून त्यांच्यासह व्यवस्थापन–संचालक व सहा सदस्य असे शासननियुक्त संचालक मंडळ त्याचे व्यवस्थापन करते. या महामंडळाची पुढील कार्ये आहेत

(१) ज्या इलेक्ट्रॉनिकी उद्योगांसाठी साहाय्यभूत उद्योग सुरू करता येण्याजोगे आहेत, असे उद्योग सार्वजनिक क्षेत्रात किंवा संयुक्त क्षेत्रात स्थापावेत, याबद्दल शासनाला सल्ला देणे;

(२) इलेक्ट्रॉनिकी औद्योगिक घटकांना संशोधन व प्रगती आणि इतर तांत्रिक सोयी तसेच त्यांच्या मालाला मजबूत विक्री संघटना उपलब्ध करून देणे;

(३) अर्ध-संवाहक शक्तिसाधनांचे उत्पादन करण्यासाठी ‘अर्ध-संवाहक मर्यादित’ ही एका विख्यात फ्रेंच कंपनीशी सहयोग करून वेगळी कंपनी नासिक येथे चालविणे;

(४) व्यावसायिक फीतमुद्रकांचे आपल्या श्राव्य-द्दश्य विभागातर्फे उत्पादन करणे;

(५) बिनतारी संदेश यंत्रसामग्रीचे एका विख्यात स्विस कंपनीच्या तांत्रिक सहयोगाने उत्पादन करणे;

(६) दूरध्वनीसाठी कार्यालयात लागणाऱ्या स्विच-फलकांचे उत्पादन करणे व

(७) आपल्या मध्यवर्ती विक्री विभागातर्फे राज्याच्या विकसनशील भागांतील कंपन्यांना सहयोगी करून घेऊन त्यांचा माल खपविणे, त्यांच्या मालाचे अचूक गुणवत्ता-नियंत्रण होत आहे, याची खात्री करणे व गुणवत्ता वाढविण्यासाठी उपाययोजना करणे. हे महामंडळाचे सर्वाधिक सर्जनशील कार्य असून त्याकरिता त्याच्या १९ कंपन्या सहयोगी आहेत.

 

लेखक - वि. गो. पेंढारकर

स्त्रोत: मराठी विश्वकोश