शेतात स्ट्रॉबेरीच्या रोपांची गादीवाफ्यावर पुनर्लागण झालेली आहे. काही ठिकाणी स्ट्रॉबेरीचे पीक फुलोऱ्याच्या अवस्थेत आहे, तर काही ठिकाणी पीक पहिल्या बहारात आहे. अशा अवस्थेत स्ट्रॉबेरी झाडाची अन्नद्रव्य व पाण्याची गरज खूप वाढलेली असते. स्ट्रॉबेरी पिकाच्या भरघोस उत्पादनासाठी खते, सूक्ष्म अन्नद्रव्ये, योग्य पाणी व्यवस्थापन व आच्छादन हे घटकसुद्धा अत्यंत महत्त्वपूर्ण आहेत.
स्ट्रॉबेरीच्या झाडांना योग्य प्रमाणात खते देणे गरजेचे असते.
- खतांची मात्रा कमी पडल्यास, झाडाच्या वाढीवर, फूल व फळ धारणेसह एकूण उत्पादनावर विपरीत परिणाम दिसून येतो. रोपे कमकुवत राहिल्यामुळे विविध रोग, किडींना लवकर बळी पडतात.
- गरजेपेक्षा जास्त प्रमाणात खते दिल्यास झाडांची शाखीय वाढ जास्त होते. पानांवरील रोगांचा प्रादुर्भाव वाढतो. हिवाळ्यात थंडीमुळे पानांना जास्त इजा होते. त्यामुळे स्ट्रॉबेरीच्या झाडांना जमिनीचा मगदूर व कोणत्या जातीची लागवड केलेली आहे, याचा विचार करून खते द्यावीत.
- सर्वसाधारणपणे स्ट्रॉबेरी पिकास प्रति हेक्टरी 40 ते 50 टन चांगले कुजलेले शेणखत व नत्र (N) 120 किलो, स्फुरद (P2O5) 100 किलो व पालाश (K2O) 75 किलो द्यावे. गादीवाफ्यावर रोप लावणीपूर्वी स्फुरद व पालाश एकत्र मातीत मिसळावे. नत्राचा हप्ता दोन किंवा तीन समान हप्त्यांत विभागून द्यावा. गादीवाफ्यावर रोप लावणीच्या वेळी (60 किलो/ हे.) व फुलधारणेच्या वेळी (60 किलो/ हे.) देण्याची शिफारस आहे.
ठिबक सिंचनाद्वारा स्ट्रॉबेरी पिकास विद्राव्य खतांची मात्रा देता येते. रोपाच्या चांगल्या वाढीच्या अवस्थेपर्यंत 19ः19ः19 या विद्राव्य खताची मात्रा ठिबकद्वारा 1 दिवसाच्या अंतराने एकरी 2.5 ते 3 किलो तसेच पिकाच्या फूल कळीच्या अवस्थेत साधारणतः 40 ते 45 दिवसानंतर 0ः52ः34 खत 1 दिवसाच्या अंतराने एकरी 3 ते 4 किलो दिल्यास उत्पादनात वाढ होते. तसेच ही खते 4 ते 5 ग्रॅम/ लि. गरजेनुसार फवारणी करावी.
पिकाच्या गरजेनुसार किंवा रोपांवरील लक्षणानुसार सूक्ष्म अन्नद्रव्याची कमतरतेनुसार सूक्ष्म अन्नद्रव्ये द्यावीत. साधारणतः स्ट्रॉबेरी पिकास बोरॉन, मॅग्नेशियम, सल्फर, कॅल्शियम आणि लोहाची कमतरता भासते. ही सूक्ष्म अन्नद्रव्ये योग्य प्रमाणात तज्ज्ञांच्या मार्गदर्शनाप्रमाणे द्यावीत.
लागवडीनंतर 30 दिवसांनी गादीवाफ्याची चांगल्याप्रकारे खुरपणी करून गादी वाफ्यावर काळ्या किंवा चंदेरी रंगाचे कागदाचे (50 मायक्रॉन) आच्छादन घालावे. स्पेन, फ्रान्स, ऑस्ट्रेलिया व अमेरिकेतील फ्लोरिडा व कॅलिफोर्निया येथे स्ट्रॉबेरी पिकात आच्छादनाचा मोठ्या प्रमाणात वापर केला जातो.
चांगला सूर्यप्रकाश आणि योग्य तापमान असल्यास स्ट्रॉबेरीला जातीपरत्वे 45 ते 65 दिवसांत फुले येण्यास सुरवात होते. हा कालावधी स्टरॉबेरीची जात व हवामानाची परिस्थिती यावर अवलंबून असते. तेथून 11 ते 16 दिवसांत फळ तयार होऊन ते 2 ते 3 दिवसांत तोडणीस योग्य होते.
स्ट्रॉबेरीच्या फळांचे उत्पादन ही बाब जमीन, हवामान, पिकाची जात, लागणीची पद्धत व लागणीचे अंतर, झाडावरील फळांची संख्या, पिकाचे व्यवस्थापन अशा विविध बाबींवर अवलंबून असते.
- श्री. एस. बी. महाजन, 9421128333
(लेखक विभागीय गहू गेरवा संशोधन केंद्र, महाबळेश्वर येथे कार्यरत आहेत.)
स्त्रोत: अग्रोवन
अंतिम सुधारित : 10/7/2020
या वर्षीच्या कमी पावसामुळे सिंचनासाठी पाण्याची उपल...
उस शेतीमध्ये पाण्याचा कार्यक्षम काटेकोरपणे, नियोजन...
एक किंवा एकापेक्षा अधिक वेळा पातळ अगर पाण्यासारखी ...
दूरदर्शन सह्याद्री निर्मित उपलब्ध पाण्याचा कार्यक्...