औदुंबर -१

सांगली जिल्ह्याच्या तासगाव तालुक्यातील दत्ताचे एक प्रसिद्ध क्षेत्र. पुणे-मिरज लोहमार्गावरील भिलवडी स्थानकाच्या पश्चिमेस ६ किमी., कृष्णेच्या पश्चिम तीरावर हे वसले असून येथे प्रशस्त व सुंदर घाट आहेत. १४२२च्या सुमारास नरसिंह सरस्वतींनी येथे चातुर्मास केल्यामुळे क्षेत्राला महत्त्व मिळाले. माघ महिन्यात येथे मोठा उत्सव भरतो. येथे गिरनारहून आलेल्या ब्रह्यानंदस्वामींचा मठ व समाधी असून, त्यांचे शिष्य सहजानंदस्वामी  यांनी बांधविलेल्या घाटावर दत्तपादुकांचे मंदिर आहे .

लेखक : र.रू.शाह

स्त्रोत : मराठी विश्वकोश